8590
1 Звезда2 Звезды3 Звезды4 Звезды5 Звезд (9 оценок, среднее: 3,44 из 5)
Загрузка...

Хоһооннор. “Бэлиэ күннэр хоһооннорго”

2021 с. муус устар 12 күнэ – сэбиэскэй космонавт Юрий Гагарин аан дойдуга бастакынан космоска көппүтэ 60 сыла.

Космос

Ийэ сир, эн бүгүн уолгун

Космос куйаарыгар көтүттүҥ,

Биһи суон сурахпытын соноттуҥ,

Үрдэттиҥ үрдүк өрөгөйбүтүн.

 

Бүгүн өссө ордук кэрэтик

Киһи диэн тыл дуораһыйда,

Киһини Совет стрэ ситигирдик

Халлааҥҥа тиийэ улаатыннарда.

 

Бүгүн үөрүҥ-көтүҥ, киэн туттуҥ,

Сир-планета, дьон-аймах барыта,

Уруйдуу туруҥ чулуу уолгутун;

Киһи сылдьыбатаҕын кини сырытта.

 

Олоҥхону олоххо таһааран,

ССоветскай дойду хорсун уола

Летчик майор Юрий Гагарин

Үрдүк космос хотойо буолла.

Николай Босиков

Космонавка айхал!

Модун Москва дорҕоонноох куолаһа

Аан дойдуну арыйа тарта:

“Көттө…” Көттө космическай куйаарга

Советскай киһи аан бастаан…”

 

Тэбэ турбут сүрэх чыпчылыйыах

түгэнэ

Эп гынан тохтоон ылла.

Субу-субу мин үрдүбүнэн

Сыйылаан ааста ол аргыс хараабыл.

 

Итиннэ мин биир дойдулааҕым

Гагарин майор айаннаан иһэр.

Сир ийэтэ долгуйар ырыатын

Киэн тутта, сэҥээрэ истэр.

 

Кини этэр:”Мин көтөн иһэбин

Америка, Африка үрдүнэн,

Чэбдикпин, эһигини истэбин

Космос куйаара биһиэнэ!”

 

Модун Москва дорҕоонноох куолаһа

Аан дойдуну арыйа тарта.

“Тиийэн кэллэ космическай куйаартан

Советскай киһи – Гагарин бастаан!”

Мария Алексеева-

              Арылы Дуйдаах

Киһи аймах Дьоллоох күнүн

Күннээх, Күндү мичээрэ –

Кини, кини, Кини этэ!

Чахчы! Юрий Гагарин!

Кууһар сири, Кууһар күнү,

Уунан тиийбэт Куйаары,

Халлаан Үрдүк Хартыгаһын –

Гений Тыыннаах Мичээрэ!

Атом Кыаҕын Муоһалаабыт

Модун Уолан Үөрүүтэ!

Эдэр, Дьоллоох, Сырдык, Чаҕыл,

Сааскы Кэрэ Эпоха!

Аан дойдуга Сабардаабыт

Атааннаһыы Чымаана,

Ирэн, биллэ Чарааһыыр,

Киһи Дьоллоох Мичээриттэн

Сиргэ эйэ Чэчириир.

Араадьыйа, Хаһыат Ахсын,

Телевизор, Рупор Устун

Хатыланар Харса суох:

ССРС! ,,Восток”! Космос!

Көттө Юрий Гагарин!

Үөрүҥ! Көрүҥ! Бука бары!

Кини Аптаах Мичээрин!

Уолан киһи Сири кууспут

Күннээх Сылаас Мичээрэ –

Эйэ, Эрэл, Таптал, Кэрэ –

Сырдык, Ыраас Сыдьаайа!

Ыра санаа, Хорсун санаа

Илэ туолбут Чахчыта!

Сүгүрүйэр Киһи аймах

Таптыыр, Ахтар Уолугар,

Дьол уотунан Ыга кууспут

Сырдык мичээр Тыыныгар…