Количество просмотров 88
1 Звезда2 Звезды3 Звезды4 Звезды5 Звезд (Пока оценок нет)
Загрузка...

Оҕом аҥардас таптаан сордонор…

Эрдэҕэс сааһы мээнэҕэ ыарахан кэм диэбэттэр: киһи бу сааһыгар туох баар өйө- санаата, уйулҕата ордук уйаҕас, ордук чараас буолар. Ол да иһин оҕо тапталга табыллыбатаҕына хаһан да көннөрүллүбэт, хаһан да ааспат иэдээн кэлбитин курдук саныан сөп. Төрөппүт бу түгэҥҥэ тугу гыныахтаах эбитий?
Бастакы таптал үксүгэр дьоло суох буолар дииллэр. Өссө, бастакы таптал киһи сайдан тахсарыгар, кэнники, дьону кытта сыһыаныгар тирэх буолар дииллэр. Оҕо бастакы дьоло суох тапталын хайдах аһарынарыттан, туох түмүктэри бэйэтэ оҥорунарыттан кэнники тус олоҕо улахан тутулуктаах. Дьэ, ол иһин, сөптөөх суолу тутустун диэн аттыгар өйдөөн истэргэ , санаатын чэпчэтэргэ бэлэм төрөппүт баар буолуохтаах эбит.
Аҕыйах оҕо бу сааһыгар төрөппүтүн кытта аһаҕастык кэпсэтэр. Үксүгэр туохха да орооһуннарыан баҕарбакка бэйэтэ бэйэтигэр бүгэр. Бу түгэҥҥэ кини баҕарыа эрэ кэрэх, хаһан баҕарар көмөлөһөр кыахтаах, кини санаатын истэр баҕалаах чугас киһи аттыгар баарын билиэхтээх. Бүүтүйэлээн баран оҕо хаһан эмэ аһылларын наадатыгар төрөппүт кэккэ сыыһалары оҥорумуон наада дииллэр эбит психологтар.
Бастакы сыыһа: «Сиртэн сэрбэйбэккэ» сылдьан… диэн саҕаланар үөрэтииттэн туттунар ордук. Оскуоланы бүтэриэхтээҕин, ЕГЭ туттарыахтааҕын, институтка киириэхтээҕин… ол эрэ кэнниттэн таптыахтааҕын үрүт- үрдүгэр санатан оҕону өссө ордук өсөһүнннэриэххэ, тэйитиэххэ сөп. Оҕоҕор таптал кэлэрэ эн баҕаҕыттан тутулуга суоҕун кытта эйэлэһэргэ бэлэм буол.
Иккис сыыһа: Төрүт да таптал туһунан куойатыгар- маҥкытыгар оҕустара илигинэ эрдэттэн айманан хас хардыытын маныыр, уоран телефонун көрөр, оҕолортон ыйыталаһар буоллаххына наадата тирээн кэллэҕинэ аһаҕастык кэпсэтиэ диэн күүтүмэ. Оҕоҥ туһугар долгуйарын өйдөнөр эрээри сиэри таһынан барбат ордук.
Үһүс сыыһа: Улахан киһи тапталыгар табыллыбатаҕына олох итинэн бүппэтин, кэнники да атын тапталы көрсүөххэ сөп диэн салгыы толкуйдуур кыахтаах. Онтон аан бастаан таптаабыт саҥа улаатан эрэр оҕо санаатыгар, сирдээҕи олох барыта, кини уонна кини тапталын тула эргийиэхтээх. Дьэ ол иһин аанньа ахтыбатахтыы сыһыаннаһар олох сыыһа диэн сэрэтэллэр психологтар. Күлүү гынан, хаадьылаан оҕо бэйэтин сэнэнэригэр тиэрдиэххэ сөп. Оҕоҥ тапталлааҕын төһө да сирдэргин санааҕын таскар таһаарыма, бэйэҕэр тут.
(матырыйаал интернет ситимиттэн ылылынна)