Количество просмотров 113
1 Звезда2 Звезды3 Звезды4 Звезды5 Звезд (Пока оценок нет)
Загрузка...

Оҕо үөхсэр буоллаҕына…

Оҕо улаатан саҥата- иҥэтэ элбээн үөрдэр… Саас буолан таһырдьа тахсан, сайын ыыра кэҥээн, алтыһар оҕото элбээн иһэр. Бастаан, саҥарбыта барыта үөрдэр буоллаҕына, кэнники тугу саҥарара төрөппүттэри толкуйдатан киирэн барар. Кыра оҕо «үчүгэй», «куһаҕан» тыллар баалларын быһаарбат. Ким эрэ саҥарбытын сонурҕаан хатылыырын эрэ билэр. Дьиэ иһигэр ким даҕаны ыыс- бурут тылы туттубат да буоллаҕына биир үтүө күн оҕоттон соһуйар тиийэн кэлиэн сөп. Ордук оҕо уһуйааҥҥа сылдьар, тэлгэһэҕэ оонньуур сааһа кэллэҕинэ. Саҥа эргимтэтин сонурҕаан сөп түбэһэ сатыыр, саҥа тыллары баһылыыр. Хомойуох иһин аныгы тыл- өс эйэҕэс тылларынан эрэ баай буолбатах. Дьэ онон, оҕо саҥа билбит тылын боруобалаан көрүөн, саҥа тылынан дьиктиргэтиэн, сөхтөрүөн баҕарар. «Куһаҕан» тылы истэн баран, дьиэтин иһигэр этэн көрүөн , төрөппүттэрэ туох дииллэрин билиэн баҕарар. Бу киниэхэ туох эрэ оонньууну санатар. Онтон төрөппүттэр сирэйдэрэ – харахтара уларыйа түһэр, кыыһырар, сэмэлиир, тугу эрэ быһаара сатыыр буоллахтарына оонньуу ордук умсугутуулаах буолар. Тыл ис хоһоонун өйдөөбөтөр да, дьоно ити тылтан кынньаналларын, сөбүлээбэттэрин өйдүүр. Төрөппүт бэйэтин быһыытынан- майгытынан бу тыл бобуулааҕын көрдөрөр. Ол бобуу төһө ыраахха дылы тайарын тургутан көрөөрү оҕо күнтэн- күн «куһаҕан» тылы туттарын ууратымыан сөп.
Тохтотор ньымалар бааллар дуо?
1. Оҕо үөхсүбүт тыла эн тус бэйэҕэр туһуламмат. Оҕо эн тылга хайдах реакциялыыргын сонургуур.
2. Тулуурдаах уонна холку буол. Этиллибит «куһаҕан» тылы истибэтэҕэ буол. Оҕоҥ оччоҕо сэҥээриини ылбакка сотору умнуоҕа.
3. Мөхпөккө- эппэккэ эрэ тоҕо инник эппитин туоһулас. Ис хоһоонун өйдөөбөккө эрэ тыл биэрэр эмоциятын хабан ылбыт буолуон сөп. Оччоҕо атаҕастаммыт эбэтэр кыыһырбыт кэмигэр үөхсүү хатыланыан сөп.
4. Боччумнаахтык оҕону кытта кэпсэтэн, итинник саҥаран дьону хоргутуннарыахха, хомотуохха сөбүн быһаар. Оргууйдук, куолаһы соноппокко этэри оҕо болҕойон истиэҕэ.
5. Оҕо барыта кэмиттэн- кэмигэр кырыктанан кэлэр. Ити түгэҥҥэ хаһан эрэ иһиллибит араас «куһаҕан» тыллара барыта тахсыахтарын сөп. Кини абарбытын өйдүүр эрээригит, «куһаҕан» тылы саҥарарын сөбүлээбэккитин этиҥ. Быһаарсан көрүҥ: тоҕо, туохтан маннык быһыыламмытын, бэйэҕит көмөлөһөргө бэлэмҥитин биллэриҥ.
6. Үөхсэр тыллары киһини өһүргэппэт тылларынан солбуйан саҥарар тыл оонньуутун толкуйдаан. Булбут тылларгытын улаханнык хаһыытаан- ыһыытаан. Оннук гынан, оҕо киҥнэммитин аһарыныа, аралдьыйыа.