190

Харлампьева Наталья

Наталья Харлампьева:
«Мин көлүөнэм кинигэҕэ сүгүрүйэ үөрэммит дьоммут. Саха ыала урут үтүө үгэстээҕэ – киэһэ, түбүк уҕараабытын кэннэ саҥа кэлбит «Хотугу сулуһу» эбэтэр саҥа кинигэни доргуччу ааҕан истии буолара. Ол курдук мин олохпор Амма Аччыгыйын «Сааскы кэмин», Николай Якутскай «Төлкөтүн» геройдара киирбиттэрэ…
Ол киэһээҥҥи ааҕыылар олоҥхону солбуйаллар эбит. Сэҥээрии, ырытыы, дьүүллэһии хайаан да буолара…
Билигин эдэр көлүөнэ кинигэҕэ сыһыана атын. Сороҕор, ол сыһыан эмиэ да сөп дуу диэн саныыр буоллум. Ити дэлэйдик тэлгэнэ сытар кылбачыгас тастаах кинигэлэргэ хабыр, тымныы тыыннаах, ньэгэй ис хоһоонноох кинигэ элбэх. Киһи ис тутулун алдьатар, сатарытар, Орто дойду сидьиҥ, дьиикэй, хараҥа күүстэрин тилиннэрэркинигэни аахпатах ордук. Дьҥнээҕи, дьоһуну, кырдьыгы көрдүүр буоллахха классикаҕа эрэ тиийэҕин. Нуучча классикатыгар, саха литературатын сүдү айымньыларыгар.
Ити икки ардын араарар ааҕааччыны иитэн таһаарар эрэ буоллахха, саха омугун, саха литературатын кэскилэ кэҥиэҕэ.» (Харлампьева, Наталья. Хоһоонум уҥуоргу кытыла: ахтыылар, этиилэр, бэлиэтээһиннэр.- Дьокуускай: Бичик, 2007.- с.206)