1132
1 Звезда2 Звезды3 Звезды4 Звезды5 Звезд (Пока оценок нет)
Загрузка...

Республикатааҕы хоһоон түһүлгэтигэр

Автор: | 20.09.2016

Бэс ыйын 11 күнүгэр куорат биир кэрэ бэлиэ миэстэтигэр Үс хатыҥҥа айар куттаах дьон мустан “Уран тыл оһуордаах ыһыаҕын” ыстылар. Тэрээһин СР Национальнай библиотекатын, Саха сирин суруйааччыларын ассоциацияларын көҕүллээһининэн ыытылынна. Бу күн республика 8 улууһуттан, Дьокуускай куораттан айар куттаах дьон көрсөн күөн көрүстүлэр.

     Биһиги улуустан улуустааҕы киин И.А. Аргунов аатынан библиотека иһинэн үлэлиир “Уран тыл” литературнай түмсүүттэн медик идэлээх, нэһилиэк общественнай олоҕор көхтөөхтүк кыттар С.П. Андросова, хомоҕой хоһоонунан, ыллам ырыатынан дьоҥҥо-сэргэҕэ биллибит В.П. Стручков – Сахамыын, оскуолаҕа үөрэнэ сылдьыаҕыттан уус-уран ааҕыыга кыттар кэскиллээх ыччатпыт М.Ф. Колесов, Баайаҕаттан республикаҕа биллэр үлэлээх “Көмүлүөк күлүмэ” литературнай түмсүүттэн (сал. А.Н. Кустурова) Н.Д. Сыромятников, В.В. Христофорова, Дьохсоҕонтон былырыын тэриллибит “Куорсун” литературнай түмсүүттэн (сал. библиотекарь Г.Н. Другина) В.В. Пинигина – Арылы, А.М. Егасова – Дьохсоҕон Кыыһа, М.И. Бочонина уонна киин библиотека библиотекара С.С. Игнатьева.

“Орто дойду хоһоонньуттарын күөн күрэһигэр” отуттан тахса автор кытынна. Бастакы түһүмэххэ бэйэлэрин хоһооннорун итийэн-кутуйан, ис истэриттэниэйэн туран аахтылар. Иккис түһүмэххэ уонтан тахса эрэ киһи хаалла. Ол иһигэр биһигиттэн В.В. Пинигина – Арылы, В.П. Стручков – Сахамыын, А.Р. Кулаковскай – Дьэҥкир. Бу түһүмэххэ барыларыгар тус туһунан тема бэрилиннэ, 15 мүнүүтэ иһигэр хайдах дьоҕурдаахтарынан айдылар, суруйдулар.

Түмүккэ, лауреат үрдүк аатын биир дойдулаахпыт Алексей Кулаковскай – Дьэҥкир, ылан үөрүүбүтүн үрдэттэ, сүргэбитин көтөхтө, киэн туттууну үөскэттэ. 1-с миэстэни Амма Болугуруттан сылдьар Сахаяна Кожурова, 2-с миэстэни Намтан Василий Ушницкай, 3-с миэстэни Чурапчыттан Иван Попов Ылан үөрүү өрөгөйүн биллилэр.

Добавить комментарий

Ваш адрес email не будет опубликован. Обязательные поля помечены *