207
1 Звезда2 Звезды3 Звезды4 Звезды5 Звезд (Пока оценок нет)
Загрузка...

Мандар Уус – дэгиттэр спортсмен

Көҥүл тустууга, буоксаҕа, ыарахан атлетикаҕа, нуучча дуобатыгар

ССРС спордун маастарыгар кандидат

Борис Федорович Неустроев – Мандар Уус спорт хас да көрүҥүн баһылаабыт дэгиттэр спортсмен буолар.   Кини спорка сыстыыта Баайаҕа оскуолатыгар үөрэнэр кэмиттэн саҕаламмыт.

Ол саҕана оройуон көҥүл тустууга бастакы чөмпүйүөнэ Дмитрий Луковцев сиэксийэ аһан, оскуола саалатыгар оҕолору эрчийбит. Сиэксийэҕэ Борис түргэн, сымса, албастары ылынымтыа буолан, бэйэтин ыйааһыныгар кимиэхэ да хотторбот буолар. 1959 сыллаахха алтыс кылааска үөрэнэ сылдьан, оскуола сүүмэрдэммит хамаандатыгар киирсэн, оройуоҥҥа күрэхтэһэ бараллар. Онно Ытык-Күөлгэ киирэн, соһуталаан кыайталаан тахсаллар. Борис Неустроев, Валентин Бурнашов, Костя Луковцев (ССРС спордун маастара) ыйааһыннарыгар бастааннар, хамаанда бастыырыгар сүрүн күүс буолаллар. Эһиилигэр хайыһарга күрэхтэһэн эстафетаҕа хамаанданан үһүс миэстэ буолаллар.

Убайа күтүөт буолан, Борис улахан кылаастарга Мэҥэ-Хаҥалас Төҥүлүтүгэр үөрэммит. Арассыыйаҕа тиийэ тустубут Миша Сивцевы, атах оонньуутугар кэлин маастар буолбут Ваня Шахурдины, Коля Скрябины, күүстээх боксер Гриша Борисовы кытта биир кылааска үөрэммит. Кинилэри батыһан спортка сыстыбыт, буокса диэн саҥа көрүҥү боруобалаабыт.

Аармыйаҕа Чуумпу акыйааннааҕы байыаннай флокка түбэһэр. Сулууспатын быыһыгар спордунан дьарыктанар, спорт элбэх көрүҥүн боруобалыыр. Көҥүл тустууга, буоксаҕа флокка уонна Приморскай кыраайга миэстэлэһэр. Сулууспалыыр сылларыгар көҥүл тустууга, буоксаҕа, ыарахан атлетикаҕа ССРС спордун маастарыгар кандидат нуорамаларын толорбут.

Аармыйаттан кэлэн баран, дойдутугар Баайаҕа орто оскуолатыгар үлэтин физругунан саҕалаабыт. Уруогун таһынан оҕолору спортка тардан сиэксийэ тэрийэн дьарыктаабыт. Уһун сиргэ сүүрүүгэ оройуон чөмпүйүөнэ буолан, оройуон сүүмэрдэммит хамаандатыгар киирбит. Биир саамай улахан ситиһиитинэн 1971 сыл Манчаары бирииһигэр 3 Спартакиадаҕа бастааһыннара буолар. Ол күрэхтэһиигэ, оччолорго эдэр сүүрүүк, Борис Неустроев 10000 м. сиргэ сүүрүүгэ өрөспүүбүлүкэ бастыҥ быһыйдарын кытта тэҥҥэ киирсэн, 34 мүн. 17 сөк. түмүктээн бочуоттаах алтыс миэстэҕэ тахсыбыт.

Борис Федорович бу сылларынан күрэхтэһэн бүтэн, Саха сирин устун историяҕа киирбит айана саҕаламмыт. Боростуой спортсментан экстремалга кубулуйбут. Кэлин дуобакка көспүт. Арассыыйа үтүөлээх тренерэ буолбут Николай Кычкин оройуоҥҥа үлэлиирин саҕана, элбэх күрэхтэһиилэр тэриллэллэрэ. Ол кэмҥэ Борис Федорович маастарга кандидат нуорматын толорбут.

Бэлэмнээтэ М.Н. Хаптагаева (Туора Күөл модельнай библиотеката)